Breaking News

Now is store time

Jun 18, 2019 02:19 by Ramya Ravilla
Now is store time
Now is store time
Now is store time

వానా కాలము - ప్రకృతి మనకు నీటిని ఇచ్చే సమయము ప్రకృతి మనకు నీటిని ఎక్కువగా ఇచ్చే సమయము - 4 నెలలు. మనకు నీరు కావలసిన సమయము - ప్రతి రోజూ లేక 12 నెలలూ. తెలంగాణా ఆంద్రప్రదేశ్ లలో సంవత్సరానికి పడే సగటు వర్షపాతము 800 m.m . అనగా ప్రతి చదరపు మీటరు స్థలము మీద ఒక సంవత్సర కాలములో 800 లీటర్ల వాన నీరు పడుతుంది. అలానె ఒక ఎకరంలో ఒక సంవత్సర కాలములో పడే వాన నీరు 3236800 లీటర్లు. ఈ నీరు పొలము విడిచి పోకుండా ఆవిరి గా మారకుండా నిల్వ పెట్టుకొనేందుగా వివిధ ప్రయత్నములు చేయాలి. 200 గజాల విస్తీర్ణములో వున్న ఒక ఇంటి పై కప్పు మీద ఒక సంవత్సర కాలములో పడే వాన నీరు 133760 లీటర్లు. 1000 గజాల విస్తీర్ణములో వున్న అపార్టుమెంటు మీదన ఒక సంవత్సర కాలములో పడే వాన నీరు 668800 లీటర్లు. ఈ నీరు డ్రైనేజీల ద్వారా బయటకి పోకుండా మన ఇంటి దగ్గరే వాడుకొనేటట్లు లేక మన ఇంటిదగ్గరే భూమిలోకి ఇంకేటట్లు ఏర్పాట్లు చేసుకోవాలి. ప్రకృతి మనకి శుద్ధమైన నీటిని మనము ఎక్కడికో వెళ్లి తెచ్చుకొనే అవసరము లేకుండా నేరుగా మన ఇంటిమీదకే లేక మన పొలములోనికే పంపిస్తుంది. కానీ మొత్తము 12 నెలలకు కావలసిన నీటిని 4 నెలల కాలములోనే ఇస్తుంది. ఒక్కసారే ఎక్కువ నీరు రావడము వలన మనము ఈ నీటిని నిల్వ పెట్టుకొని తిరిగి వాడుకోవాలి. ప్రతి ఇంటి యందు వాన నీటిని దాచుకొనే ట్యాంక్ / సంప్ ను మొదట నిర్మించుకోవాలి. ట్యాంక్ నిండితే మిగిలిన నీరు భూమిలోకి పోవడానికి వాన నీటి ఇంకుడు గుంతను నిర్మించుకోవాలి. ఇవి రెండూ నిండినాకనే డ్రైనేజీలోకి వాన నీరు పోవాలి. ఇటువంటి పద్దతులను మనము అందరమూ ఇంటి దగ్గర పొలముల దగ్గర ఆచరించడము వలన ప్రభుత్వము మనకి ఉచితముగా ఇచ్చే నీటి మీద లేక విద్యుత్తూ మీద ఒత్తిడి తగ్గుతుంది. నీరు అందరికీ సంవృద్ధిగా అందుతాయి. వాన నీటిని నిల్వ పెట్టుకొనే తిరిగివాడుకొనే పద్ధతులు I) ఇంటి దగ్గరనే వాన నీటిని దాచుకొనే పద్ధతులు: 1). భూగర్భములో ట్యాంక్ లేదా సంప్ ను నిర్మించి నీటిని నిల్వ ఉంచుకొని తిరిగి ఇంటి అవసరముల కోసము వాడుకోవచ్చ్చును. అదే నీటిని ఫిల్టర్ చేసుకొని లేదా మరగబెట్టుకొని లేదా రెండు పద్దతుల ద్వారా శుద్ధి చేసుకొని తాగు నీటికోసము వాడుకొనవచచ్చును. లేదా నీటిని శుద్ధి చేసి తాగడము కోసము పిడకలు కాల్చిన బూడిదను నీటికి కలిపి ఇంకా 4 లేదా 5 చిల్ల గింజలను నీటిని ఉంచే బిందె లేదా కుండ యందు రాత్రి అంతా ఉంచి ఆ నీటిని త్రాగుటకు వాడ వచ్చును. 2) బోరు బావి కి దగ్గర లో ఇంకుడు గుంతను నిర్మించి ఎక్కువ నీటిని భూమిలోకి పంపవచ్చుఁను.. దీనివలన ఆ నీరు మరలా బోరు బావి ద్వారా తరువాతి కాలములో మనకు అందుతూ ఉంటుంది. 3) బోరుబావి వున్నా లేకున్నా ప్రతి ఇంటి అందు / ఆఫిసు యందు ఇంకుడు గుంత ను నిర్మించవలెను. అంతే కాకుండా అపార్టుమెంటు యందు/ వాణిజ్య సముదాయము లందు ఇంకా రహదారులకు ఇరువైపులా ఇంకుడు గుంత ను నిర్మించవలెను. దీనివలన ఎక్కువ వాన వచ్చినప్పుడు డ్రైనేజీ లు / కాలువలు పొంగి పొరలవు. రహదారులు జలమయము కావు.ట్రాఫిక్ జాములు కావు. ఎక్కువ వాన నీటిని ఇంకుడు గుంతల ద్వారా ఎక్కడికి అక్కడ భూమిలోకి ఇంకించడము వలన భూగర్భ జలములలో వుండే ఉప్పు తనము కొంత వరకు తగ్గుతుంది. దీని వలన భూగర్భ జలాల రుచి పెరుగుతుంది. II) పొలముల దగ్గర వాన నీటిని నిల్వ ఉంచుకొనే పద్ధతులు : 1) పొలములోని మొత్తము భూభాగములో 5 నుండి 10 శాతము భూమిని చెరువులు / కుంటలు నిర్మాణానికి వదులుకోవాలి. పొలములోను పొలము చుట్టుపక్కల పడిన వర్షపు నీరు చెరువులోకి కుంతలలోకి పోయే విధముగా ఏర్పాట్లు చేసుకోవాలి. బావి ఉంటే అందులోకి వాన నీరు పోయేవిధముగా ఏర్పాట్లు చేసుకోవాలి. ఇటువంటి నిర్మాణాలు కోస్తా ఆంధ్ర ప్రదేశ్ తెలంగాణా రాష్ట్రములోని కొన్ని ప్రాంతములకు అనుకూలము. 2) ప్రతి పావు ఎకరం చుట్టూ ఒక ట్రెంచ్ ను తవ్వాలి. 1 ఆడుకు వెడల్పు అర అడుగు లోతు తో ప్రతి పావు ఎకరం చుట్టూ తవ్వుకోవాలి. ఇటువంటి విధానము రాయలసీమ తెలంగాణా రాష్ట్రాలలో సాగుచేసే ఉద్యానవన పంటలకు కొన్ని పొలాలకు ఎక్కువ ఉపయోగము. 3) ప్రకృతి వ్యవసాయ విధానములో వున్న భూములు అన్నీ 2 లేక 3 సంవత్సరములలో వాన నీటి ఇంకుడు గుంతలుగా మారిపోతాయి. ప్రకృతి వ్యవసాయము చేయడము వలన భూమిలోపల సహజముగా వుండే వానపాముల సంచారము బాగా పెరుగుతుంది. అటువంటి భూమిలో మట్టి బాగా గుల్లగా (Porous ) మారుతుంది. రెండు లేక మూడు సంవత్సరములలో యంతైనా నీటిని పీల్చుకొనే స్థితిని ఆ మట్టి కణాల అమరిక కలిగివుంటుంది. అందువలన యెంత పెద్ద వాన పడినా ఆ పొలములో పడిన నీరు అంతా అక్కడనే ఇంకిపోతుంది. అదే నీరు మరలా ఆవిరి రూపములో మొక్కకు తేమగా అందుతూ ఉంటుంది. ఇటువంటిభూమిలో మొక్కలు కొన్ని రోజులు పాటు నీరు లేకపోయినా తట్టుకొని జీవిస్తాయి. ఇంకా అతి తక్కువ నీటితో పంటలు పండించవచ్చును. అందువలన భూగర్భమునుండి నీటిని తోడి వాడే పరిస్థితి తగ్గుతుంది.

Facebook like
Google Plus Circle
Youtube Subscribe