Breaking News

నాలుగేళ్లలో ఇచ్చింది 20 వేల కోట్లే

Feb 12, 2018 20:39 by Admin Admin

నవ్యాంధ్రకు ఈ నాలుగేళ్లలో.. కేంద్ర ప్రభుత్వం ఇచ్చిన నిధులెన్నో తెలుసా? కేవలం రూ.20 వేల కోట్లు. ఇందులో ప్రత్యేకంగా ఇచ్చినవి రూ.10 వేల కోట్లు మాత్రమే. రాష్ట్రానికి కనీవినీ ఎరుగని రీతిలో కేంద్రం లక్షల కోట్ల మేర నిధులు ఇచ్చిందని బీజేపీ నేతలు గత శనివారం ఢిల్లీలో ప్రకటించడం.. ఈ గణాంకాలు తప్పుల తడకలని టీడీపీ నేతలు తిప్పికొట్టిన నేపథ్యంలో... రాష్ట్రానికి అసలెన్ని నిధులు వచ్చాయో ప్రభుత్వ వర్గాలు లెక్కలు తేల్చాయి. రెండు మిత్రపక్షాల నడుమ మాటలు, ఆరోపణలు, విమర్శలు అంతకంతకు ముదురుతున్న పరిస్థితుల్లో.. రాష్ట్రానికి కేంద్రం కేటాయించిన నిధులు.. వాటి పరిస్థితి ఏంటి అన్న విషయంపై రాష్ట్ర ప్రభుత్వ వర్గాలు దృష్టిసారించి లెక్క తేల్చాయి.

సుమారుగా రూ.3.55 లక్షల కోట్ల మేర నిధులు ఇచ్చామని బీజేపీ చెప్పగా.. ముఖ్యమైన పద్దుల కింద కేంద్రం నుంచి వచ్చింది రూ.20 వేల కోట్లు మాత్రమేనని తేలింది (అంటే ఆ మొత్తంలో కేవలం 5.6 శాతమన్న మాట). ఇందులో ప్రత్యేకంగా ఏపీకి ఇచ్చింది రూ.పది వేల కోట్లు (2.8 శాతమే). అన్ని రాష్ట్రాలకు ఇచ్చే నిధుల్లో భాగంగా వచ్చింది మిగతాది. అయితే అన్ని రాష్ట్రాలతోపాటు ఇవ్వాల్సిన నిధుల్లో కూడా రాష్ట్రానికి అన్యాయం జరిగిందని.. బీజేపీ జాబితాలో పేర్కొన్న పథకాల కింద రాష్ట్రానికి మొత్తం రూ.28 వేల కోట్లు రావలసి ఉండగా.. అందులో రూ.పది వేల కోట్లే వచ్చాయని ఆ వర్గాలు వెల్లడించాయి. పోలవరం ప్రాజెక్టుకు అయ్యే మొత్తం వ్యయాన్ని కేంద్రమే భరిస్తుందని చెప్పారు.
 
నాబార్డు ద్వారా రుణం ఇప్పించి.. తానే చెల్లిస్తానని ప్రకటించింది. ఇంతవరకు రాష్ట్రం సొంతంగా ఖర్చుపెట్టిన రూ.7,179 కోట్లే తిరిగి చెల్లించలేదు. అప్పుడో వంద కోట్లు.. ఇప్పుడో 300 కోట్లు అంటూ.. ఈ నాలుగేళ్లలో రూ.4332 కోట్లు రీయింబర్స్‌ చేసింది. ఇంకా రూ.2847 కోట్లు ఇవ్వాల్సి ఉంది. దీనినే పూర్తిగా చెల్లించని కేంద్రం.. ప్రత్యేకంగా ప్రాజెక్టు నిర్మాణానికి రూపాయి విడుదల చేయలేదు. అసలు పెరిగిన అంచనా వ్యయాన్నే ఇంతవరకు ఆమోదించలేదు. బీజేపీ నేతలు విడుదల చేసిన నిధుల వివరాల్లో పోలవరం లెక్కలు లేకపోవడం గమనార్హం.
 
ఇక రాష్ట్రంలో జాతీయ రహదారులకు రూ.లక్ష కోట్లు ఇచ్చినట్లు బీజేపీ ప్రకటనలో తెలిపారు. కానీ వచ్చింది మూడువేల కోట్లే. జలరవాణా, విశాఖ-చెన్నై కారిడార్‌, కోస్టల్‌ ఎకనమిక్‌ జోన్‌, నాగాయలంక మిస్సైల్‌ యూనిట్‌కు మొత్తం రూ.15,226 కోట్లు ఇచ్చినట్లు బీజేపీ నేతలు గొప్పగా లెక్కలు చెప్పగా.. విడుదల చేసింది సున్నా. ప్రధానమంత్రి ఆవాస్‌ యోజన ఇళ్లకు రూ.17,292 కోట్లు ఇచ్చినట్లు చెప్పారు. కానీ 1500 కోట్లు మాత్రమే రాష్ట్రానికి వచ్చాయి. ఇక రెవెన్యూ లోటు ఊసే లేదు. అది ఎంత ఉందో ఇంతవరకు కేంద్రం నిర్ధారించలేదు. రెవెన్యూ లోటు భర్తీ, ప్రత్యేక ప్యాకేజీలో భాగంగా విదేశీ సహకారంతో చేపట్టే ప్రాజెక్టు(ఈఏపీ)ల ద్వారా రావాల్సిన నిధుల గురించి కేంద్ర ఉన్నతాధికారులతో చర్చించడానికి రాష్ట్ర ప్రణాళికాసంఘం ఉపాధ్యక్షుడు కుటుంబరావు ఢిల్లీ వెళ్లారు. అయితే సోమవారం వారెవరూ అందుబాటులో లేకపోవడంతో చర్చలు జరగలేదు.

Facebook like
Google Plus Circle
Youtube Subscribe